07:59:43 "Барселона" футболчилари ўзга сайёраликмас | |
 Барселона шаҳридаги "Камп Ноу” стадионида Европа Чемпионлар лигаси ярим финал жавоб учрашуви доирасидаги "Барселона” ҳамда "Челси” жамоалари ўртасидаги ўйин бўлиб ўтди. Учрашувда 2:2 ҳисобидаги дуранг қайд этилди ва "Челси” Чемпионлар лигаси финалига йўл олди. Учрашув бошланмасидан аввалоқ ҳар иккала жамоа олдига қўйилган вазифа аниқ эди. "Барселона” гол киритиши (битта эмас, камида иккита), "Челси” эса гол ўтказмаслиги зарур эди. Ҳакамнинг ҳуштаги чалиниши билан ҳар иккала жамоа ушбу вазифани амалга оширишга киришиб кетишди. Аммо "Барселона” ўз майдонидаги ўйинда гол киритиши учун нақ 35 дақиқа керак бўлди. Унгача бўлган уринишларнинг барчаси лондонликлар томонидан бартараф этиб турилди. 35-дақиқада бурчак тўпидан сўнг Куэнка тўпни жарима майдончаси ичига ерлатиб ошириб берди. Бу ерда ҳозиру- нозир бўлган Бускетс бўш қолган дарвозага тўп йўллаб, ҳисобни очди. Голдан руҳланган каталонияликлар рақибга босимни оширишга ҳаракат қилишди. Учрашувдаги туб бурилишдардан бири 37-дақиқада содир бўлди. Кучли босимга асаблари дош бермаган Жон Терри тиззаси билан Алексис Санчис ортидан зарба бериб, уни майдонга қулатди. Ёрдамчи ҳакам билан маслаҳатлашиб олган бош ҳакам туркиялик Гунайт Чақир Террига бир йўла қизил карточка кўрсатиб, уни майдондан четлатди. Сон жиҳатдан майдонда устун бўлиб қолган "Барселона” бундан тезда фойдалана олди. 43-дақиқада "Челси” футболчиларидан тўпни олиб қўйган "Барселона” классик ҳужум уюштирди. Мессининг пасидан сўнг Иньеста Чех билан бирга-бир вазиятга чиқиб бориб, ҳисобни 2:0 кўринишига олиб келиб қўйди. Шу дақиқада "Барселона” ўз олдига қўйган вазифани бажариб бўлганди. Бу ёғига каталонияликларни тўхтатиб қолишнинг иложи йўқдек эди гўё... Аммо биринчи бўлим якунига етиб бораётган вақтда "Челси” ҳужумчиси Рамирес Валдеснинг олдинга чиқиб кетганидан фойдаланиб, тўпни "парашют” услубида унинг устидан ошириб, дарвозага жойлаб қўйди. Бу гол "Барселона” учун вазиятни яна қийинлаштирди... Иккинчи бўлимда "Барселона” яна бутун жамоа бўлиб олдинга ўтиб, ҳужум уюштиришни бошлади. Бу ҳолат тезда ўз самарасини берди. Ҳимоячиларга ёрдамга етиб келган Дидье Дрогба ўз жарима майдончаси ичида Фабрегасни чалиб йиқитди. Бош ҳакам бир оз "ўйланиб” туриб, ён ҳакамнинг ишорасидан сўнг "Челси” дарвозаси сари пенльти белгилади. 11 метрлик нуқтага Месси яқинлашди. Биргина гол "Барселона”га руҳий устунлик тақдим этиб, ўйинни хотиржам тарзда якунлаш имконини берар эди. Аммо... Мессининг кучли зарбаси дарвоза тўсинини "зиррр” титратиб, майдонга қайтди. Мейрелеш бу тўпни ўз жарима майдончасидан узоқлаштириб юборди... Бу ҳолат "Челси” футболчиларига руҳий устунлик тақдим этди. Эндиликда улар катта иштиёқ билан рақиб ҳужумларини қайтара бошлашди. Имкон туғилганда эса ўзлари ҳам онда-сонда қарши ҳужумга ўтиб туришни унутишмади. "Барселона” турли тарафдан "Челси” дарвозаси сари йўл излаб кўрди. Аммо бугун бу йўлларнинг барчаси берк эди... Ҳаттоки, Мессининг зарбаларини қайтариш учун дарвоза устунлари ҳам Чехга ёрдамга келиб турди. Учрашувнинг сўнгги дақиқасида эса Дрогба ўрнига майдонга тушган Торрес гол киритиб, ўйинга якуний нуқта қўйди. Шу тариқа ўзга сайёраликларга қиёсланган "Барселона" футболчилари ярим финалда ўз юришларини тўхтатишди ва кетма-кет учинчи марта майдонни бошлари эгик ҳолда тарк этишди. ЕЧЛ, 1/2 финал. Жавоб учрашуви. "Барселона" – "Челси" — 2:2 Голлар: Бускетс (35), Иньеста (43) - Рамирес (45), Торрес (90+2). Амалга оширилмаган пенальти: Месси, 48 "Барселона”: Вальдес, Пуйоль, Пике (Дани Алвес, 26), Маскерано, Фабрегас (С. Кейта, 74), Хави, Бускетс, Иньеста, Санчес, Месси, Куэнка (Тельо, 67). "Челси”: Чех, Иванович, Кэйхилл (Босингва, 12), Терри, Э.Коул, Мейрелеш, Оби Микел, Мата (Калу, 58), Лэмпард, Рамирес, Дрогба (Торрес, 80). Огоҳлантиришлар: Оби Микел (32), Рамирес (44), Иванович (48), Иньеста (50), Чех (59), Месси (71), Лэмпард (72), Мейрелеш (89). Четлатиш: Терри (37). Манба: uff.uz
| |
|
| |
| Всего комментариев: 0 | |