11:39:58 Телефонларда тарқаган "илон аёл" ҳақиқатми? | |
 Маълумки, ҳаммамиз ҳам янгиликка, шов-шувга ўчмиз. Айниқса, бугун ҳаётимизга шиддат билан кириб келаётган интернет тармоқлари, турли алоқа воситалари орқали бир зумда дунёнинг нариги четидаги воқеадан ҳам хабар топишимиз мумкин.
Айни дамда ана шундай хабарлардан бири ҳамманинг оғзида: "Илон аёл"ни кўрдингизми?" Мана шу биргина саволнинг ўзиёқ юрагингизда хавотир ва ғашлик уйғотади. Унинг телефонларда тарқаган видео тасвирини кўргач қай аҳволга тушишингизни тасаввур қилаверинг. Миш-мишлар эса янада даҳшатли: "Андижонда бир аёл ҳажга бориб келибди. Келгач, ношукрлик қилиб "илондек судралиб бориб келдик", деган экан илонга айланиб қолганмиш..." Балки сиз бу гапнинг бошқачароқ талқини эшитгандирсиз: "Самарқанднинг "Андижони" деган жойидан бир аёл ҳажга борибди. Келгач, "Одамлар Каъба атрофида илондек айланар экан", деган экан, Аллоҳнинг каромати билан илон қиёфасига кирганмиш..." Бу миш-миш ва уни тасдиқловчи телефонлар орқали тарқалаётган видео лавҳа ҳар қандай кишини сергак тортдиради. Лекин бу аслида ҳақиқатми? Бу каби хабарларнинг асл замирида нима ётибди? Биз бугун ана шунга ойдинлик киритишга ҳаракат қилдик. Изланишларимиз шуни кўрсатдики, ушбу "томоша"нинг асл манзили YouTube.com интернет веб-сайти. Қайсидир "қаҳрамон" уни телефонига кўчириб олган-у, қизиқишлар туфайли ўз-ўзидан тарқаб кетган. Сайтдаги ушбу видеолавҳа ҳақида қолдирилган фикрлар бизни бефарқ қолдирмади: "Яхшиликка чорлашда бунақа қўрқитув йўли билан эмас, гўзаллик, тинчлик билан ҳам қилинса бўлади-ку! Қўрқитиш билан ҳеч қачон яхшиликка эришилмаган. Ҳар бир инсонинг ўз ақли, идроки бор. У ҳар хил бемаъни нарсаларга ишониш учун берилмаган. Бу видео сохталикдан бошқа нарса эмас..." дея изоҳ қолдирган бир томошабин. Кейинги томошабиннинг муносабати ҳам шунга яқин: "Бу яна нимаси? Далил, исбот ва манзилсиз бўлган бу видеони худонинг иши дейиш яхши эмас. Бунинг қўғирчоқ эканлиги кўриниб турибди-ку! Бизнинг халқимиз ҳаддан ташқари ишонувчан ва ваҳимачи... Арзимаган нарсадан шунақа ҳикоялар тўқиб ташлашадики... Яхшиликка меҳр, беғуборлик, гўзаллик билан чорлашни ўрганайлик. Бу инсонда нафратдан ва жирканишдан бошқа туйғуни уйғотмайди..." Яна шуни аниқладикки, бу "илон аёл томоша"сини илк бор 2009 йил 26 декабрда ўз исмини "kabisote100" деб кўрсатган YouTube.com сайти мижозларидан бири видеолавҳани "SNAKE WOMEN (in,INDONESIA)" номи билан жойлаштирган. Демак, биз "ўзимизники" қилиб олган "илон аёл" Андижон ёки Самарқанднинг "Андижони"да эмас Индонезияда "туғилган" экан. Кейинчалик, яъни 2010 йилда ушбу лавҳа худди шу сайтга яна қўйилган ва унга "157 ёшли илон аёл" дея изоҳ берилган. Ниҳоят, 2012 йил 1 март куни ушбу сайтда юқоридаги миш-миш билан Venin92 муаллифлигида бу тасвир яна пайдо бўлади. 2 март куни эса, MrVAHID968 томонидан яна қўйилган ва қўйидагича изоҳланган. (Изоҳларни сайтдан қандай бўлса шу ҳолича кўчирдик. Хато ва жумладаги ғализликлар биздан эмас): "Аллах превратила женщину змею за то что она сказала что хадже в Мекке люди ходят как змеи вокруг каабы". alijonbratan деган "қаҳрамон" эса 4 март куни ушбу изоҳ билан яна худди ўша сайтга жойлаштиради. (Изоҳларни сайтдан қандай бўлса шу ҳолича кўчирдик. Хато ва жумладаги ғализликлар биздан эмас): "ilon ayol " hajga borib kelgan keyin esa uni ziyorat qilgani kirganlarga hajda yurganlarini aytib bergan hamma qoratoshni atrofida ilonga uhshab aylanaverarkan deb kop marotaba odamlarga shu narsalarni aytgan kirgan ziyoratchilarga .ohiri oqibat shu ahvolga tushgan allohni qahriga uchragan biz ham bu gaplarnii odamlardan eshitib yozdik u erda bolgan voqeani faqat alloh biladi Alloh ozi asrasin". Кўриб турганингиздек, бу ерда на жой номи, на далил, на асос билан гапирилган. Бу видеолавҳанинг уйдирма ва сохта эканлигини энди ўзингиз ҳам англаб турибсиз. Шундай экан, ҳар доим хулоса чиқаришга ва миш-мишларга ишонишга шошилманг. ВИДЕО ҲАМ, ИЛОН ҲАМ СОХТА! Биз масалага янада ойдинлик киритиш учун мутахассисга ҳам мурожаат қилдик. Аҳмад Назаров, рассом-монтажчи: — Видео тасвир умуман Ўзбекистонга тегишли эмас. Буни "илон аёл" образининг айнан ўзбекларга ўхшамаслиги, атрофидаги одамларнинг кийими, буюмлар ва деталлардан ҳам билиш мумкин.Кадрдаги бир кўк футболкадаги одамнинг кийимида арабча ёзув бор, аммо хира. Бир секунд (25 кадрлар) орасидаги тасвирда арабча ҳарфни аниқ кўриш мумкин. Кийимлардаги безаклар ҳам бунинг исботи. Кейин буюмлар, идиш ва бошқа нарсалар бизники эмас. Бундай нарсалани сездирмаслик мақсадида атрофдаги айрим деталларни ўчириш учун glow(аниқлигини йўқотувчи) ва blur (хиралаштириш) эффектлари ишлатилган. Яна бу видеотасвирнинг ўзи ҳам сохта. Буни монтаж программасида 1 секундни секинлаштириб кадрма кадр кўрилса,ҳаммаси уюштирилганлиги кўриниб турибди. Framelaда илон бошқаю, атрофдагилар бошқа. Агар қариндоши ёки миллати бир хил одамлар бўлганида уларнинг ўхшаш жиҳатлари бўларди. "Илон аёл"нинг ўзига тўхталсак, уям ясама, сохта. Сочлари тана рангига мос эмас. Боши ҳам аёлникига эмас, кўпроқ эркак кишининг бош суягига ўхшайди. Оёқлари қуш суягидан ясалган. У афсонавий аждарни эслатади. Аммо, ясаган "уста" негадир афсонавий аждарда қанот ҳам бўлишини унутган. Овоз ҳам шу сохталиклардан бири, ҳар ҳолда илон ўлик-ку, қани бу ерда ўзбекларнинг овози? Хуллас, бу жирканч роликда ўзбекларга хос жиҳат йўқ. "БИЗГА МУРОЖААТ ҚИЛАЁТГАНЛАРНИНГ САНОҒИ ЙЎҚ!" Шайх Абдулазиз Мансур, Ўзбекистон мусулмонлари идораси раиси ўринбосари: — Бу гап чиққандан буён, бизга мурожаат қилаётганларнинг саноғи йўқ. Ҳар бирига бу нарса буҳтон эканлигини айтиб келяпмиз. Бунақа воқеа биринчи марта бўлаётгани йўқ. Ёдингизда бўлса, "каламушга айланган аёл" ҳам шунақа шов-шув бўлганди. Шуни унутмангки, бунақа ёлғонларни тўқиб чиқариш ҳам, унинг ортидан бойлик орттириш ҳам гуноҳ. Шундай экан, гуноҳдан тийилиш, бу каби сохталикларга ишонмаслик лозим. | |
|
| |
| Всего комментариев: 0 | |